За нас

Здружението за еколошко одржлив развој ЗЕЛЕН ИНСТИТУТ е формирано во 2013 година во Скопје. Работиме на развивање и промоција на зелените политики во Македонија, внесувајќи ги во главните општествени текови. Веруваме во обединувачката моќ на зелените политики, базирани на почит кон природата, хуманост и солидарност. Се поврзуваме и соработуваме со организации и институции кои ја имаат истата кауза како идеал и цел, во земјава и во светот.

Нашата мисија е да ги развиваме и промовираме зелените политики во Македонија, како катализатори за развој на демократијата, подобaр квалитет на живот и поголема граѓанска кохезија. Да ги поврзуваме граѓаните, експертите и носителите на одлуки на локално, национално и меѓународно ниво, преку истражување и експертиза, дебати и обуки.

Посветени на зелените вредности и на грижата за нашата Планета Земја, се залагаме за заштита на животната средина и одржлив развој, за демократија и социјална правда, за мир и почитување на човековите права.

Нашата визија е Македонија со еколошки свесни граѓани, задоволни што живеат квалитетен живот во здрава животна средина и добиваат квалитетни услуги од професионални институции.

Се залагаме за:

1) зелени политики и законска регулатива во Македонија, обука на зелени активисти и подигање на еколошката свест кај граѓаните;

2) зелена и циркуларна економија, заради заштита на климата и обезбедување одржлив развој и подобар квалитет на живот;

3) учество на граѓаните во процесите на одлучување, како гаранција за чување на јавниот интерес и превенирање од корупција во екологијата;

4) демократија, човекови права, владеење на правото, како основа за слободно и  праведно општество.

Се грижиме и нудиме еколошко одржливи концепти за проблемите во животната средина во повеќе области: клима, загадување, отпад, рударство, води, урбанизам. Инсистираме на зелена економија со обновлива енергија, паметни градови, органска храна, екотуризам. Се бориме против корупција во екологијата, со јакнење и граѓански надзор на инспекторатите за животна средина и други институции. Одлучно се бориме за демократија, човекови права и владеење на правото, како предуслов за слободно и  праведно општество.

Здружението ги остварува своите цели преку:

1) истражување и експертиза за закони и други прашања од животната средина, економијата и демократските процеси;

2) јавни дебати, конференции и други настани со учество на релевантни заинтересирани лица, како и домашни и странски експерти;

3) едукација и обука за јакнење на капацитетот на јавни службеници, носители на одлуки и зелени активисти (тематски предавања, промоција на зелени политики, стратешко планирање, лобирање и застапување, работа со медиуми);

4) мониторинг и оценка на институциите од областа на животната средина;

5) печатење публикации за студии и истражувања;

6) лобирање и застапување за зелените политики;

7) активности за подигање на свеста за зелените политики (кампањи, медиски претставувања);

8) вмрежување и соработка со организации и институции кои работат на зелените политики во земјава и во странство.